أسئلة شائعة


ايه هو ساهم؟

ساهم هو شبكة تواصل اجتماعي باللغة العربية مخصصة لعمل الخير ونشر الإيجابية وتنمية المجتمع. تقدر تعتبره زى الفيسبوك و لكن مخصص للتواصل البناء في مجالات الخير و التنمية المختلفة.

انتم ابتديتم امتى؟ احنا شوفنا إعلانات ليكم بس كانت كلها تبرع للمؤسسات و الجمعيات الخيرية

ده صحيح. كنا عاملين أصدار خلال سنه 2016 و كانت السمة الغالبة له خدمات التبرع. كان هدفنا الرئيسى دعم المؤسسات الخيرية والتنموية و المبادرات في وطننا العربى عن طريق ربط حملات التبرع و التوعية بالمتبرعين و المساهمين و محبى عمل الخير. الإصدار الجديد لساهم اشمل و اعم و فيه كل خصائص التواصل الإجتماعى بلإضافة طبعا للتبرع.

أنا عجبانى الفكرة بس مقدرش اتبرع حالياُ و لا عندى كريدت كارد أساساً, إزاي ممكن أساهم؟

ولا يهمك :) ساهم مش بس للتبرع ! فيه حملات بتبقى للتوعية و كل اللى مطلوب منك انك تنشر فيديو أو صفحة على الإنترنت. في حملات بتبقى محتاجه مجهود ميدانى (زيارة مرضى في مستشفى، تطوع لإرسال طعام لمناطق معينة مثلا ..). مجرد انك تكمل بياناتك في الموقع و تدعو أصحابك و تحكيلنا ناوى تعمل خير إزاى كل يوم (حتى بتعاملك الكويس مع الناس) ده من أعلى درجات المساهمة.

طيب اعرف إزاى انكم هتوصلوا الفلوس للجمعيات و المؤسسات الخيرية المشتركة معاكم؟

دى نقطة مهمة. إحنا أساسا مش بناخد أي فلوس تبرعات، إحنا بنوصل المتبرع لصفحة البنك التابع للمؤسسة الخيرية بشكل مباشر. تبرعاتك بتوصل مباشرة لحسابات المؤسسات الخيرية، وممكن تتأكد من كده ﻷن موقع ساهم بينقلك عند مرحلة التبرع لصفحة البنك التابع للمؤسسة و بتلاقى فيها اسم المؤسسة وده تأكيد ان فلوسك بتوصل بشكل مباشر ليها.

طيب أضمن إزاى ان المؤسسة هتصرف التبرعات في المجال المخصص ليها؟

دى طبعا مسئولية المؤسسة مش موقع ساهم و لكن عموما كل المؤسسات و الجمعيات الخيرية بتخضع لرقابة الدولة.

الفكرة حلوة لكن وسائل الدفع بالكريدت كارد بس, إزاي ناس معهاش كرديت كارد تتبرع من خلال ساهم؟

دى حقيقة و لكن خلال الشهور القادمة هنزود طرق دفع كتيرة و متنوعة

مين اللى ورا ساهم؟ إنتم مين؟

إحنا شركة مصرية متخصصة في مجال البرمجيات على الإنترنت و لينا خبرة عالمية في المجال ده . ساهم إبداع مصري خالص و كمان مدعم من وزارة الإتصالات المصرية وهيئة تنمية صناعة البرمجيات – ايتيدا.

ينفع أشتغل معاكم؟

لو أنت شاب طموح خريج هندسة برمجيات أبعت السى في على الإيميل ده : [email protected] و لما تكون فيه فرصة هنتواصل معاك.

طيب إنتم مصلحتكم ايه وبتكسبوا منين؟

طبعا لازم يكون في بعد مادى علشان نقدر نصرف على الدعاية و نطور الموقع أكتر. إحنا هنكسب من الإعلانات و من دعم الشركات للحملات. مش بناخد أي نسبة من التبرعات اللى بتدخل للمؤسسات من خلال الشبكة.

مش عاملين نسخة إنجليزى ليه؟

هنعمل إنجليزى الفترة القادمة .. إحنا إبتدينا بالعربى (قريب من العامية) لما لقينا إن مفيش شبكة زى ساهم كده في الوطن العربى كله و فضلنا أن اللغة تكون مناسبة للشباب ، هنعمل نسخة إنجليزى و كمان نسخة باللغة العربية الفصحى لما هنتوسع إقليمياً و هنسيب للمستخدم حرية الإختيار.

مفيش موبايل أبليكشن لساهم؟

فيه لكن للإصدار القديم و بنجهز لإطلاق نسخة جديدة خلال الأيام القادمة.

لو عندى مؤسسة و عايز أفعل حملات تبرع على ساهم المفروض أعمل ايه؟

ساهم بيتيح خدمات متميزة للمؤسسات و الجمعيات اللى ليها بعد تنموى بالذات في مجالات الصحة و التعليم و الغذاء و مساعده المحتاجين، لخاصية التبرع لازم تكون المؤسسة مسجلة و مرخصة و يحق لها تلقى التبرعات و ده بيكون عن طريق الدفع الالكترونى بالكريدت كارد . ده بيتم من خلال البنوك زى البنك الأهلى و البنك العربى الأفريقي . رجاء التواصل معنا من هنا.
احنا مش بندخل مؤسسة جديدة على الموقع غير بعدما نتأكد من قانونيتها وبيكون في اجراءات للتعاقد. و الخطوة الاولى هي التواصل معانا.
ساهم مش يياخد أي نسبة من التبرعات، هو وسيلة لإيصال المتبرع لصفحة الدفع الإلكترونى الخاص بمؤسستكم. اى تبرعات بتوصل بشكل مباشر لحسابكم فلى البنك.

مؤسستى صغيرة و معندناش إمكانية حالية لتلقى التبرعات عن طريق الإنترنت

مش مشكلة، تقدر تعمل صفحة لمؤسستك من انشاء صفحة جديدة من خلال حسابك على موقع ساهم. و تستفاد من مجتمع ساهم لنشر خدمات مؤسستك و تشجع المساهمين انهم يعملوا مجموعات لدعم اهداف مؤسستك.

يعنى ايه مجموعة الخير؟ مش واضح دور المجموعة في الموقع؟

فكرة المجموعة يمكن صعبة وجديدة لكنها من أقوى مميزات ساهم. في الأول بتكون مجموعة وبتحدد الإهتمامات وبتدعو أصحابك انهم يشتركوا في المجموعة دى كمرحلة أولى، وممكن تعتبر إن المجموعة ديه زى الجروب بتاع الفيسبوك مثلا.

( مثال ) لو حملة تابعة لمؤسسة عندها هدف انها تجمع 100000 جنيه لشراء اجهزة طبية لمستشفى، تقدر تشترك عن طريق مجموعتك انك بتحط هدف لدعمك الحملة دي (مثلا 2000 جنيه) وتستغل ادوات التواصل في ساهم علشان تشجع أعضاء مجموعتك للمشاركة والتبرع.

ببساطة المجموعة طريقة لتزويد المنافسة بين الشباب لعمل الخير.

و لو معرفتش أحقق هدف مجموعتي في الحملة .. ايه اللى هيحصل؟

ولا حاجة خالص و مفيش أي الزام ! الهدف بس علشان يكون فيه حماس ومنافسة .. حط هدف و متقلقش لو اتحقق جزء صغير منه.

هو أنا لو حطيت هدف للمجموعة أنا هلم تبرعات في حساب شخصي؟

لا أطلاقاً .. كل التبرعات أونلاين و بتروح بشكل مباشر لحسابات المؤسسات.. تبرعات مجموعتك كلها هتوصل للمؤسسات و لكن هتظهر في المؤشر فى صفحة دعمك للحملة. دورك تشجع مجموعتك بس مش أكتر.

إزاى مؤسسة جديدة تشترك معاكم؟

لو المؤسسة مسجلة و يحق لها تلقى التبرعات تتواصل معانا هنا ، إحنا مش بندخل مؤسسة جديدة على الموقع غير بعد ما نتأكد من قانونيتها وبيكون في إجراءات للتعاقد. لكن الخطوة الأولى هي التواصل معنا.