أسئلة شائعة
ايه هو موقع ساهم؟
موقع ساهم هو موقع تواصل إجتماعى يهدف الى دعم المؤسسات الخيرية والتنموية و المبادرات في وطننا العربى عن طريق ربط حملات التبرع و التوعية بالمتبرعين و المساهمين و محبى عمل الخير. تقدر تعتبره زى الفيسبوك و لكن مخصص لمجالات التبرع و العمل الخيرى.
طب ما أغلب المؤسسات الخيرية عندها صفحات على الفيسبوك. ايه الإختلاف يعنى؟
فعلا دى حقيقة لكن الصفحات دى بتستخدم أكتر لنشر أخبار المؤسسة و أحيانا للتوعية. موقع ساهم موظف خصائص التواصل الإجتماعى للتبرع و العمل الخيرى. احنا مش بنافس الفيسبوك و لا عايزين نبقى زيه، إحنا بس مستخدمين فكر الشبكات الإجتماعية لتحقيق هدفنا اللى هو "نتواصل لدعم مجتمعنا".
أنا عجبانى الفكرة بس مقدرش اتبرع حالياُ و لا عندى كريدت كارد أساساً, إزاي ممكن أساهم؟
ولا يهمك :) ساهم مش بس للتبرع ! فيه حملات بتبقى للتوعية و كل اللى مطلوب منك انك تنشر فيديو أو صفحة على الإنترنت. في حملات بتبقى محتاجه مجهود ميدانى (زيارة مرضى في مستشفى، تطوع لإرسال طعام لمناطق معينة مثلا ..). مجرد انك تكمل بياناتك في الموقع و تدعو أصحابك و تحكيلنا ناوى تعمل خير إزاى كل يوم (حتى بتعاملك الكويس مع الناس) ده من أعلى درجات المساهمة.
طب اعرف إزاى انكم هتوصلوا الفلوس للجمعيات و المؤسسات الخيرية المشتركة معاكم؟
دى نقطة مهمة. أحنا أساسا مش بناخد أي فلوس تبرعات، أحنا بنوصل المتبرع لصفحة البنك التابع للمؤسسة الخيرية بشكل مباشر. تبرعاتك بتوصل مباشرة لحسابات المؤسسات الخيرية، وممكن تتأكد من كده لإن موقع ساهم بينقلك عند مرحلة التبرع لصفحة البنك التابع للمؤسسة و بتلاقى فيها اسم المؤسسة وده تأكيد ان فلوسك بتوصل بشكل مباشر ليها.
طب أضمن إزاى ان المؤسسة هتصرف التبرعات في المجال المخصص ليها؟
دى طبعا مسئولية المؤسسة مش موقع ساهم و لكن عموما كل المؤسسات و الجمعيات الخيرية بتخضع لرقابة الدولة.
مش عاملين نسخة إنجليزى ليه؟
هنعمل إنجليزى الفترة القادمة .. إحنا إبتدينا بالعربى (قريب من العامية) لما لقينا إن مفيش شبكة زى ساهم كده في الوطن العربى كله و فضلنا أن اللغة تكون مناسبة للشباب ، هنعمل نسخة إنجليزى و كمان نسخة باللغة العربية الفصحى لما هنتوسع إقليمياً و هنسيب للمستخدم حرية الإختيار.
عندى إقتراحات لساهم لأنى حاسس انه ممكن يكون أحسن من كده, تحبوا تسمعوا إقتراحاتي؟
نتشرف جدا بأى إقتراحات!.. احنا لسه بنبتدى و طبعا مفيش حاجة كاملة بالذات في البدايات. تواصل معانا وأكيد الإقتراحات المجمعة (يعنى اللى أكتر من واحد بيقولها) هتاخد أولوية عندنا.
مين اللى ورا ساهم؟ أنتم مين؟
إحنا شركة مصرية متخصصة في مجال البرمجيات على الإنترنت و لينا خبرة عالمية في المجال ده . ساهم إبداع مصري خالص و كمان مدعم من وزارة الإتصالات المصرية وهيئة تنمية صناعة البرمجيات – ايتيدا.
يعنى ايه فريق؟ مش واضح دور الفريق في الموقع؟

فكرة الفريق يمكن صعبة وجديدة لكنها من أقوى مميزات ساهم. في الأول بتكون فريق وبتحدد الإهتمامات وبتدعو أصحابك انهم يشتركوا في الفريق ده . دى المرحلة الأولى وممكن تعتبر إن الفريق ده زى الجروب بتاع الفيسبوك مثلا.


بعد كده بتشترك في الحملات عن طريق فريقك ده. لو حملة عندها هدف انها تجمع 100000 جنيه لشراء أجهزة طبية لمستشفى (مثلا)، انت و فريقك بتحط هدف لدعمك للحملة دى (مثلا 2000 جنيه) وتستغل أدوات التواصل في ساهم علشان تشجع أعضاء فريقك للمشاركة والتبرع.

ببساطة الفرق طريقة لتزويد المنافسة بين الشباب لعمل الخير.

و لو معرفتش أحقق هدف فريقى في الحملة .. ايه اللى هيحصل؟
ولا حاجة خالص و مفيش أي الزام ! الهدف بس علشان يكون فيه حماس ومنافسة .. حط هدف و متقلقش لو اتحقق جزء صغير منه.
هو أنا لو حطيت هدف للفريق أنا هلم تبرعات في حساب شخصي؟
لا أطلاقاً .. كل التبرعات أونلاين و بتروح بشكل مباشر لحسابات المؤسسات.. تبرعات فريقك كلها هتوصل للمؤسسات و لكن هتظهر في المؤشر فى صفحة دعمك للحملة. دورك تشجع فريقك بس مش أكتر.
الفكرة حلوة لكن وسائل الدفع بالكريدت كارد بس, إزاي ناس معهاش كرديت كارد تتبرع من خلال ساهم؟
دى حقيقة و لكن خلال الشهور القادمة هنزود طرق دفع كتيرة و متنوعة.
مفيش موبايل أبليكشن لساهم؟
لا في و بنجهزه للإطلاق خلال الإيام القادمة.
الموقع مش بيفتح على الموبايل بشكل كويس, المشكلة فين؟
ساهم بيشتغل علي كل أجهزة الكمبيوتر و اللاب توب وبنجهز برضة mobile version و هتكون شغالة على كل الموبايلات قريب.
طب أنتم مصلحتكم ايه وبتكسبوا منين؟
طبعا لازم يكون في بعد مادى علشان نقدر نصرف على الدعاية و نطور الموقع أكتر. إحنا هنكسب من الإعلانات و من دعم الشركات للحملات و بنحصل مصاريف إدارية من المؤسسات في حالة نجاح الحملات على الموقع.
يعنى ايه مبادرات؟
المبادرات بيعملها الأفراد (مثلا مبادرة للتوعية بترشيد الكهرباء) و بتسخدم أدوات ساهم للنشر و التوعية. حملات المبادرات كلها للتوعية و لا يحق لها تلقى تبرعات.
إزاى مؤسسة جديدة تشترك معاكم؟
لو المؤسسة مسجلة و يحق لها تلقى التبرعات تتواصل معانا لو المؤسسة مسجلة و يحق لها تلقى التبرعات تتواصل معانا هنا ، إحنا مش بندخل مؤسسة جديدة على الموقع غير بعد ما نتأكد من قانونيتها وبيكون في إجراءات للتعاقد. لكن الخطوة الأولى هي التواصل معنا.